Wala nag-gasto sang dako ang gobyerno sa ginpatigayon nga Virtual Brigada Eskwela subong nga tuig.
Sa interview sang Bombo Radyo Bacolod kay Mr. Richard Gelangre, presidente sang Bacolod City Public Schools Teacher Federation, ginpahayag sini nga mas nakatipid ang Department of Education sa Virtual Brigad Eskwela bangud indi na kinahanglan sang mga representative nga magpadulong sa isa ka lugar agud magsapol.
Sang una suno kay Gelangre, kinahanglan pa nga maggasto sang dako ang gobyerno para diri bangud nagatipon ang mga tiglawas sa isa ka lugar.
Apang sa karon, internet nalang ang kinahanglan.
Nahibalun ng kahapon, madinalag-on ang paghost sang DepEd Region 6 sa paglunsyar sang Virtual Brigada Eskwela subong nga tuig.
Ginpahayag man sini nga ginatinguhaan sang DepEd nga matigayon ang enrollment nga indi face to face kaangay lamang sang remote enrollment nga ginapatigayon sa karun.
Ini ang pagkontak sang maestra sang bata sang tinalikdan nga tuig.
Mahimo nga paagi sa messenger, text message ukon facebook.
Suno kay Gelangre, may yara na karon sang 1.4 million ka mga kabataan nga nakapa-enroll na sa bilog nga pungsod.
