Nakapauli na sa ila mga panimalay ang pila sa mga evacuees sa pag-alburuto sang Bulkan Kanlaon.
Sa interview sang Bombo Radyo Bacolod kay Juanito Jarbonido, vegetable vendor sa Libertad Public Market kag residente sa banwa sang La Castellana, madamo na sang mga nagpauli balik sa ila mga panimalay sa sulod sang 6km radius Extended Danger Zone sang Bulkan Kanlaon agud nga makabalik sa ila nga mga palangabuhian.
Suno kay Jarbonido nga mapatay ang ila palangabuhian nga utanon ukon kararuton kun ini ang mapabay-an.
Aminado ini nga sa kasagsagan sang pag-alburuto sang bulkan dako ang nangin pagsaka sang ila produkto nga nagdangat sa P50, apang sa karun ini ang nagbalik na sa normal nga presyo.
Suno diri, mahimo na nga makapauli ang mga pumuluyo apang kinahanglan nga magpirma, nga wala na sang salabton ang municipal government.
Iban sa mga evacuees ang nagapangita man sang iban nga palangabuhian kaangay sang pagtrabaho bilang tapasero sang tubo ukon nagapadulong sa Bacolod agud magpangita sang palangitan-an.
Ini bangod ayawan ang mga ini sang hulat kun magsalig lamang sa pagkaon gikan sa local government unit, nga masami late na kun mag-abot.
Suno naman kay Roza Acebutche, kalabanan na lamang sang mga nabilin sa evacuation centers amo ang mga may kabataan kag katigulangan sa pamilya.
Ang mga kasapatan ang kalabanan ang napanaog naman partikular na sa mga lugar nga gintup-an sang madamol nga ashfall.
Sa karun pila sa mga kasapatan sang mga pumuluyo ang ginabaligya na kun sa diin ang mga karbaw ang kun kaisa mabakal na lamang sa balor nga P10,000.
