Pila ka mga ginikanan sang Grade 4 pupils sang Rizal Elementary School sa ciudad sang Bacolod ang nagakahangawa bangud nga ang ila nga classroom ang nagatulo sa tion nga mag-ulan nga nagatuga sang pagdanaw sa sulod sang classroom kag ang kisame ang tuman na ka delikado kun marumpag.
Suno sa mga ginikanan nga nagpalab-ot sang reklamo sa Bombo Radyo Bacolod, ang ila nga mga kabataan ang aga pa nagakadto sa eskwelahan agud manglimpyo kag magmop sang salog.
Ginpahayag sang mga ini nga ginapaislan sang mga ini sang maayo kag malimpyo nga uniform ang ila nga mga bata apang pag-abot sa eskwelahan ang nagapanglimpyo kag nagapang-mop pa sang salog.
Suno sa mga tagreklamo, gin-una pa sang eskwelahan ang pagpakay-o sang canteen kumparar sa pagpakay-o sang atop kag kisame sang classrooms nga nagatulo kag daw marumpag na ang kisame.
Suno pa sa aligasyon sang mga ginikanan sang mga estudyante nga indi pagpakay-o sang eskwelahan ang kisame sang classroom sang Grade 4 kun indi makuha ang long table didto kag ginpadangat naman sang manunudlo ang problema sa school principal apang wala man nahimuan sang tikang agud nga masolusyunan ang problema.
Sa karun, ginatinguhaan pa sang Bombo Radyo Bacolod nga makuha ang pahayag sang school principal sang Rizal Elementary School angot diri.
