Nagpanawagan sang bulig ang pila ka mga operator kag drayber sang Public Utility Jeepneys nga nagabyahe sa ruta sang Brgy Punta Taytay matapos nga sila ginpasakaan sang kaso sang Choret Corporation nga 38 counts of carnapping.
Suno kay Maria Teresa Burata, consolidated franchise operator sang Choret Corporation, nagasuporta sila sa modernization program sang gobyerno amo nga nakig-angot ini sa Choret Corp sa pagpaconsolidate sang ila nga franchise.
Suno diri, sila tanan ang naggasto kag nagproseso sa tanan nga papeles agud sila makasulod lang sa modernization program kag wala sang ano man nga gintrabaho diri ang Choret Corp.
74 ka mga units ang gin-award sang Land Transportation Franchising and Regulatory Board through notice of selection apang una nga 44 pa lang ang units nga nag-abot.
Sila man ang nagabayad sa Choret Corp sang tag P1,000 sa kada units kada bulan para sa mga dokyumento sang ila modernization vehicle.
Pahayag ni Burata may yara sila sang dokyumento sang ila bayranay humalin pa sang Oktubre 10, 2022 tubtob sang Setyembre 15, 2023 kag nagdangat na sa kapin sa P8 million ang ila nahatag sa Choret Corp.
Apang, sila ang ginpasakaan sang 38 counts of carnapping sang Choret sa panindugan naman sini nga wala sila nagabayad.
Gikan sa 44 ka mga units, 38 ang nasulod sa ginfile nga kaso bangod ang isa ka unit ang gindakop sang Land Transportation Office kag ini gingawad sang Choret Corp, ang isa naman ang ginpakay-o apang ini man ginkuha sang Choret Corp samtang ang apat naman diri ang nakuha sang Choret paagi sa pagbayad sa drayber kag konduktor nga ila igarahe ang unit sa grahe sang Choret Corp.
Samtang, luyag naman sang bana ni Maria Teresa Burata, nga mapalab-ot ang ila problema sa senado nga sila nagasuporta man sa modernization program apang wala sila mahatagan sang proteksyon sa pagpaconsolidate sa isa ka kooperatiba.
Suno kay Philip Burata, sila gin-abisuhan nga ila lantawon ang certified copy sang Securities and Exchange Commission kag didto na nila nahibaluan nga lima lamang ka miyembro nila ang nakalista sa korporasyon imbes nga 22.
Nagapati ini nga matapos nila madiskubrehan ang kulang sa lista, amo nga ginpasakaan sila sang kaso sang Choret Corp.
Samtang, wala naman sang agreement sa papeles ang duha ka bahin bangod sang sila nangayo, sila ginhambalan sang sekretarya nga indi naman klinahanglan pa, amo nga notebook nalang sang bayranay may yara sila.
Nagapangayo ini sa karun sang bulig nga mapadangat sa senado ang ila problema nga para sa iya maayo man ang modernization program sang gobyerno apang wala lang nahatagan sang proteksyon ang mga operators kag drivers inkaso nga sila magsulod sa isa ka kooperatiba.
