Ginalauman sa gihapon sang isa ka jeepney driver nga magabalik ang anay manubo nga presyo sang produktong petrolyo nga sa karun nagapauli na lang ini sang kapin P500 kada adlaw.
Sa interview sang Bombo Radyo kay Rey Alanis, kumporme ini nga nagnubo sang masobra duha ka pesos ang presyo sang gasolina kag diesel apang indi sa gihapon maayo ang lakat sang iya pagbyahe.
Suno diri, sa 20 ka tuig bilang jeepney driver naagyan pa sini ang presyo nga P30 kada litro, kag sadto maayo ang pagbyahe sini kag dako ang mapauli nga kwarta apang sa karun, nagadangat lamang sa P500 tubtob P700 ang kwarta sini sa pagbyahe.
Apisar sa paglaum sini nga magnubo pa ang bili sang gasolina, ginlantaw man sini nga indi na ini matabo bangod masami nga naganubo sang piso ang presyo kag nagasaka sang masobra pa.
Apang sa paghimakas sini sa pagbyahe sang iya traditional jeep nga nagikan pa sa iya amay, napatapos ni Alanis ang bata sini sa pag-eskwela nga nakaligad gid lamang nakapasar sa board exam bilang licensed physician.
Ginhingyo man ini sang iya kabataan nga mag-untat na sang byahe apang indi sini luyag nga mangayo lang sa iya kabataan gani nagabyahe ini para makabulig sa sulod balay kag para sa iya kaugalingon.
Samtang, nagapanawagan ini sa kaangay nga mga drayber kag operator sang traditional jeepney nga mag-isa para sa kaayuhan kag ila mapadayon ang pagbyahe nga ila nagapanguna nga palangabuhian.
