Ginpaidalom kaina sa blue alert level ang tanan nga mga disaster teams sa bug-os nga probinsya sang Negros Occidental kadungan sang wala naga-untat nga pag-ulan humalin pa kahapon kag kaina gindeklarar ang ang orange rainfall warning sa probinsya.
Suno kay Provincial Disaster Management Program Division Head Zeaphard Caelian, ang blue alert level kun sa diin nakaheightened alert ang mga disaster teams sa bilog nga probinsya bangud pila ka adlaw na ang pag-ulan kag nagahumok na ang duta.
Ginabantayan man ang mga water level sa suba kag iban pa nga mga waterways kag gina-abisuhan ang publiko nga mangin alerto.
Wala man sang narekord nga nag-evacuate bangud sa pagbaskog sang ulan.
Gina-abisuhan man ang mga residente nga magpatigayon sang pre-emptive evacuation kun kinahanglanon na bangud sa paglain sang panahon.
27 ka mga LGU ang nagsuspend sang klase nga ginlakipan sang syudad sang Bacolod San Carlos; Manapla; Silay City; Cadiz City; Sagay City; La Carlota City; Valladolid; Salvador Benedicto; at Victorias City; Himamaylan City; Isabela; EB Magalona; Pontevedra; Escalante City; Murcia; Binalbagan; Cauayan; Hinigaran; Bago; Ilog; La Castellana; Talisay; Pulupandan; Calatrava; kag Kabankalan City bangud sa mabaskog nga pag-ulan.
Nagpatigayon man sang paghinun-anon ang pinuno sang Bacolod City Disaster Risk Reduction Management Office (BCDRRMO) kaina sang aga kag ang city council kaupod ang bise alkalde sang syudad sang Bacolod matapos nga ginpaidalom ini sa orange rainfall warning santo sa advisory sang PAG-ASA agud isuspend ang klase.
Sa interview sang Bombo Radyo Bacolod kay Dr. Laarni Pornan, gin-athag sini nga wala gilayon makadeklarar sang suspension sang klase ang alkalde sang Bacolod City bangud kaina alas 5:00 ang takna sang aga, yellow warning palang ang ginpagwa sang PAG-ASA gani sang antes mag-alas 8:00 ang takna kaina sang aga, nagpagwa na ang PAGASA sang orange rainfall warning gani nagmeeting gilayon ang syudad kag ginrekomendar sang CDRRMO nga class suspension santo man sa memorandum sang DepEd nga kun orange rainfall warning na automatic wala na sang klase.
Ginpahayag man ni Pornan nga ang orange rainfall warning ang preparedness samtang ang red rainfall warning ang kinahanglan nga magresponde na sa komunidad.
Bangud sa mabaskog nga pagbubo sang ulan nakaeksperyensya man sang pagbaha ang pila ka bahin sang syudad isa na diri ang Barangay 4.
