Lunsay gikan sa Southern Negros Occidental ang mga local government units nga nagreport nga nakaeksperyensya sang pagbaha.
Sa interview sang Bombo Radyo Bacolod kay Negros Occidental Provincial Disaster Risk Reduction and Management Office head Irene Bel Ploteña, may pila na ka LGUs nga nagreport nga nahalitan sang pagbaha kalakip na ang banwa sang Hinobaan, Cauayan, Ilog, Moises Padilla, Kabankalan City kag Himamaylan City.
Apang sa karun ginahulat pa nila nga maconsolidate ang final number sang apektado, pila ang nagatinir sa evacuation centers, kag kun may naguba nga balay.
Sa ila record ang baha ang yara sa tuhod tubtob sa hawak ang kataason.
Unpassable naman para sa mga light vehicles ang National Highway sa banwa sang Ilog bangod yara sa tatlo ka tapak ang kataason sang baha.
May power interruption man nga nagluntad sa banwa sang Binalbagan sang kaagahon, kag sa karun nabalik na ang kuryente magluwas sa pipila nga area nga nagapatay-patay ang power supply.
