Pila ka mga lugar sa ciudad sang San Carlos kag ciudad sang Sagay ang ginbaha kahapon kadungan sang Valentine’s Day.
Sa interview sang Bombo Radyo Bacolod kay San Carlos City Mayor Rene Gustilo, ginpahayag sini nga nag-awas ang tubig sa ila nga suba kun sa diin natam-an gid ang Purok Tindalo kag Purok Lubi sa Barangay 1.
Apisar indi man gid tuman ka taas sang tubig-baha, ginpakamaayo sang city government nga I-evacuate ang mga pumuluyo sa amo nga lugar bangud nga wala naga-untat ang ulan.
Gindala ang mga evacuees sa Ramon Magsaysay Elementary School apang gilayon naman nga nagpauli matapos naghulaw na.
Suno sa alkalde, plano nila karon nga pataason kag kaayuhon ang riprap sa suba agud nga indi ini mag overflow.
Magluwas dira, ila man nga kuhaan sang duta ang sa likuon nga nga bahin sang suba agud nga mag-diretso ang flow sang tubig.
Nagpanugyan naman ini sa mga pumuluyo nga samtang wala pa nakaayo ang suba, magpreparar nalang sa pag-evacuate kun maglawig ang ulan agud indi maabtan sang baha.
Samtang, lima naman ka mga barangay ang apektado sang pagbaha sa ciudad sang Sagay.
Kabug-usan nga 16 ka pamilya nagikan sa Purok 9, Barangay Poblacion 1; Purok Malipayon, Barangay Poblacion 2; Barangay Rizal kag Barangay Old Sagay ang naapektuhan sang pagbaha.
Maswerte naman nga nakaluwas ang driver sang motorsiklo nga gin-anod samtang nagatabok sa overflow river sa Barangay General Luna apang missing naman motorsiklo sini.
