HONG KONG — Nangin mainit ang pagbukas sang absentee voting sa Hong Kong kag may nagluntad pa nga komosyon sa tunga sang mga overseas Filipino workers.
Suno kay Bombo International Correspondent Rhodora Macaya direkta sa Hongkong, gindugok sang mga tawo ang voting center sa Hong Kong sa una nga adlaw sang absentee voting bangud excited ang mga OFW.
Suno kay Macaya, madamo nga mga kapulisan ang ginpangdeploy apang nabudlayan gihapon ang mga ini nga magsaway sa mga botante nga nagahabuyanay sang malain nga mga tinaga batok sa isa kag isa.
Masami nga ginasinggitan sang mga supporters ni Vice President Leni Robredo suno diri ang tinaga nga “kawatan” samtang nagasinggit naman sang “lutang” ang mga supporters ni former Senator Ferdinand “Bongbong” Marcos.
Suno sa iya, tuman ka laba ang pila kag naglab-ot na ini sa dalan kag apisar nga alas 8:00 sang aga tubtob alas 5:00 sang hapon ang schedule, sa una nga adlaw, alas 12:00 pa lamang sang udto nagsirado na ang voting center bangud nalab-ot na ang maximum nga numero sang mga botante.
Suno diri, sa una nga adlaw lamang gindugok sang mga tawo ang voting center bangud sang Domingo, pagboto sini, matawhay na ang sitwasyon.
Suno sa OFW, sang una nga adlaw sang pagboto, lima lamang ang ila counting machines gani medyo mahinay ang pagproseso apang sa karun ini ang nadungangan na.
