Nagapati ang pila ka mga opisyales sa 1st District sang Negros Occidental nga dapat lantawon ang positibo nga madulot sang Negros Island Region.
Nahibaluan nga ginaduso ni Negros Oriental Governor Roel Degamo ang pagtukod sang bag-o nga probinsya nagikan sa Negros Occidental kag Negros Oriental agud nga mangin patas ang pagbinotohay kun matukod ang NIR upod ang Siquijor.
Sa interview sang Bombo Radyo kay anay Toboso mayor kag sa karun Municipal councilor sang Toboso, Ritchie Jaojoco, pabor ini sa ginatawag nga NIR ilabi na kun serbisyo ang paga-istoryahan bangud sila ang malapit sa kapitolyo.
Suno diri, indi na kinahanglan sang mga tawo nga magpadulong pa sa ciudad sang Bacolod kag amo man nga mas mahapos kun may yara sang itukod nga provincial heads kag provincial director sang kapulisan.
Gani, iya ginpanugyan nga mas manami kun ini ang maistoryahan kag lantawon kun ano ang postibo kag negatibo nga resulta sang NIR sa probinsya apang suno kay Jaojoco, mas luyag sini nga may bag-o nga probinsya bangud maayo ang epekto sini sa ila nga serbisyo.
Samtang, suno naman kay San Carlos City Mayor Renato Gustilo, wais ang pamaagi ni Negros Oriental Governor Roel Degamo sa pagsaylo sang atensyon sa declaration sang NIR.
Suno diri , humalin sang tion ni former Governor Alfredo Maranon, nag-oppose na ini kag amo sadto nga tion, gina-eksperimentuhan pa kun ano ang tikang nga mahimo nga para indi na magbyahe ang tagsa-tagsa padulong sa Bacolod City para magproseso sang mga dokumento ukon requirements sa national offices.
Apang sa karun nagduso naman si Degamo nga pagpatukod pa gid sang isa ka province, nga suno kay Gustilo ini ang maka-divert sang atensyon bangod nga kun ini ang matuman malawig ang prsoeso sang pagtuon sini nga magadula sang konsentrasyon nga buhion ang Negros Island Region.
