Sa programa sa SMX Convention Center antes pa man ang pagsugod sang mass oathtaking sang mga elected Barangay and Sangguniang Kabataan officials, naghatag man sang mensahe ang pila ka mga nagapanguna nga opisyales sa ciudad sang Bacolod.
Kalakip diri sa Bacolod Lone District Congressman Greg Gasataya, nga nagpasalig nga may-ara sang pondo nga igapanaog sa kada Barangay para sa pagbakal sang brand new vehicle.
Paathag sang kongresista nga iban sa mga Barangay ang may schedule na sang bidding, samtang panugyan naman sini sa mga panibag-o nga Punong Barangay nga magkoordinar sa ila bangod ang budget ang magagikan sa National Government.
Samtang ginpalab-ot naman ni Bacolod City Vice Mayor El Cid Familiaran sa re-elected kag newly elected Barangay kag SK officials nga siya ang bag-o lamang nakabalik sa ciudad matapos ang meeting sa Department of Trade and Industry (DTI) para sa social integration sang government transactions.
Paathag ni Familiaran nga ini ang patigayunon sa online business registration sang permit and licensing division.
Suno sa bise alkalde, ang Bacolod City amo ang pinakauna nga local government unit (LGU) nga maka-avail sang programa.
Kun sa diin pinaagi sini ang business processing kaangay sang business name ang matransact sa sulod lamang sang duha tubtob tatlo ka segundos.
Ini ang kabahin sang tikang padulong sa target nga mangin super city ang ciudad sang Bacolod.
Apang panawagan ni Familiaran nga dapat mapasanyog ang legislative skills sang mga Barangay officials bisan pa sa bahin sang Barangay Kagawad kag Sangguniang Kabataan.
Agud makatuon, ginapanugyan sini ang pagtambong sa session sang Sangguniang Panlungsod kada Miyerkules agud maka-obserbar.
Dugang pa sini, dapat nga indi magkahuya ang mga Barangay officials sa pagpamangkot.
Nagpasalig naman ang pinuno sa Department of the Interior and Local Government (DILG) – Bacolod sa mga local officials nga sila ang magasuporta agud ang mga ini ang makaserbe sang maayo sa ila constituents.
Suno kay Dra. Ma. Joy Marideth Madayag, luyag nila makita ang maayo, may ikasarang, kag masaligan nga Barangay official.
Paathag sini nga luyag sang DILG nga mangibabaw ang good governance sa kada Barangay, gani nagalaom ini nga wala sang magapasaway samtang pasalig sini nga magapabilin ang pagsuporta sang ahensya sa administrasyon.
Suno kay Madayag, magagiya ang DILG sa first 100 days sang pagpamuno sang mga re-elected kag new Barangay Officials.
