Mismo ang mga tawo sa Barangay Caningay, banwa sang Candoni, Negros Occidental ang nagboluntaryo nga mag-evacuate matapos ang pagbayluhanay sang lupok sa tunga sang katapo sang New People’s Army (NPA) kag tropa sang gobyerno kahapon.
Sa interview sang Bombo Radyo Bacolod kay Nicholas Lachica, pinuno sang Candoni Assistance, Rescue and Emergency Services, wala pa sila sang data kun pila ang nag-evacuate apang santo sa inisyal nga ila nakuha, anum ka mga pamilya ang nag-evacuate nagikan sa Barangay Caningay, 12 sa Barangay Agboy kag may yara man nagikan sa Barangay Payawan apang wala ang mga ini nagpadulong sa evacuation centers, sa baylo nagpadulong ang mga ini sa balay sang ila mga himata kag kakilala.
Suno kay Lachica, ang lugar nga ginluntaran sang engkwentro ang natung-an sang nagkalain-lain nga barangay.
Nagpanugyan man ini sa mga pumuluyo nga indi na maggwa kun ang mga ini ang wala nakaevacuate bangud delikado pa ang sitwasyon.
