Nakapauli na sa Pilipinas ang pila ka mga Pilipina nga nakapamana sang Sri Lankan kadungan sang economic crisis bangud sa pagka-bankrupt sang South Asian country.
Suno kay Bombo correspondent Christina Sorongon, nag-abot sila sa Ninoy Aquino International Airport ala-1:00 kahapon sang hapon matapos nga mag-avail sang repatriation program sang gobyerno.
Suno diri, apat ka oras ang byahe nagikan sa Colombo padulong sa Singapore kag apat naman ka oras halin sa Singapore padulong sa Manila.
Kaupod si Sorongon nga nagpauli ang duha niya ka bata nga nagaedad sang 15 kag tatlo ka tuig samtang nabilin ang iya bana.
May nakaupod man ini nga taga-Aklan nga may dala nga isa ka bata.
Suno kay Sorongon, duha lang sila sa 3rd set sang 1st batch sang repatriation.
May iban pa gid kuntani nga kaupod ni Sorongon apang wala pa narelease sang Philippine Consulate ang travel documents sang iya bata gani ginrebook nalang ang iya flight.
Bangud unvaccinated ang iya bata nga 15-anyos, magaquarantine sanday Sorongon sa hotel sa Manila sa sulod sang lima ka adlaw.
Ang kaupod naman niya nga taga-Aklan ang nagdiretso na pauli bangud vaccinated ang iya bata.
Si Sorongon ang ulihi nga nakapauli sa Pilipinas sang tuig 2018.
Kun magtawhay ang sitwasyon suno sa iya, nagaplano ini nga magbalik sa Sri Lanka bangud nabilin didto ang iya bana kag isa ka anak. Samtang, malipayon ang mga Pinoy nagikan sa Sri Lanka nga nakapauli na sila sa Pilipinas kadungan sang economic crisis.
Suno kay Bombo correspondent Christina Sorongon, mabudlay magpadulong sa airport bangud wala sang transport gani tuman ang ila kalipay nga nakapauli na sa Pilipinas.
Suno kay Sorongon, madamo sang mga Pilipino nga luyag kuntani magpauli apang nagaproblema sa kwarta nga kinahanglan sa pagproseso sang travel documents bangud sila mismo ang nagagasto para diri kag indi libre.
Wala naman sang may mahimo ang Philippine Consulate kun wala sang kwarta ang isa ka Pinoy gani indi ini mahatagan sang travel documents.
Gin-ako sang Pinay nga wala sila nakahibalo nga obligasyon nila nga iparehistro ang kabataan antes mag-abot sa edad nga isa ka tuig agud mahapos ang pagproseso sang repatriation bangud wala sila nakabaton sang kaangay nga impormasyon nagikan sa Konsulada.
Suno diri, nahibaluan nalang ang kaangay nga patakaran sang nagluntad na ang krisis kag kinahanglan nga magproseso sang pagpauli sa Pilipinas.
May iban naman nga mga Pilipino nga indi makaproseso sang mga requirements bangud malayo sila sa capital nga Colombo.
