Ginkumpirmar sang Department of Foreign Affairs (DFA) nga pila ka mga Filipino ang nalakip sa mga casualty matapos nga nag-crash kag nagbaliskad ang isa ka tour bus sa New York nga gintunaan sang kamatayon sang lima ka mga tawo kalakip na ang isa ka bata kag dinosena ang pilason.
Suno sa DFA, gin-report sang New York Police nga pila ka casualties ang mga Pilipino apisar nga wala sini ginhinambit kun pila ang napilasan ukon kon ano ang kondisyon sang mga apektado nga Pinoy.
Samtang, nagpalab-ot naman sang pangamuyo ang DFA sa mga apektado sang insidente.
Sa karun, wala pa sang dugang nga impormasyon nga ginpagwa ang mga otoridad kag sa baylo ginpahayag nga direkta nila nga ipahibalo sa pamilya sang mga biktima angot sa insidente.
Ginpahayag man sini nga aktibo nga ginamonitor sang Philippine Consulate ang sitwasyon kag handa nga magbulig sa mga biktima nga nagakinahanglan sang bulig.
Nagpanugyan ang Consulate sa mga Pinoy nga may mga himata nga posible naulamid sa insidente nga magtawag sa Assistance to Nationals Section emergency hotline sa (917) 294-0196.
Suno sa report, may yara sang 52 ka mga turista kalakip na ang driver ang sakay sang bus nga kalabanan wala nakasuksok sang seat belt sang natabo ang aksidente.
Nagresulta ini sa pagtabog sang mga pasahero samtang ang iban naman ang nabungguan sang salakyan.
Suno sa local police ang tour bus ang nagapauli sa New York City halin sa Niagara Falls sang ang driver ang nadulaan sang kontrol sa bus kun sa diin nagbunggo sa median sang New York State Thruway malapit sa banwa sang Pembroke kag nagligid sang pila ka beses antes nag-untat sa higad sang dalan.
Ang pila sa mga kritikal nga napilasan ang gin-airlift kag gindala sa ospital agud madapatan sang nagakaigo nga pagbulong.
