Magapangita sang trabaho sa Madrid, Spain ang isa ka overseas Filipino worker nagikan sa Ukraine matapos ginpahanugutan sang iya mga amo nga maghalin na sa ila luyo kag sa pungsod.
Sa interview sang Bombo Radyo kay Joy Fernandez Tolentino nga yara sa karun nagatinir sa Vienna, Austria, malapit lima ka oras ang iya ginbyahe nagikan sa Ivano-Frankivsk, Ukraine padulong sa Hungary kag kaina, nagadagsa ang mga refugees sa Budapest Train Station.
Suno kay Tolentino, bukas ang tanan nga borders para sa mga nagikan sa Ukraine kag ipakita lamang ang ila mga IDs nga may tatak nga sila ang refugees, libre na ang ila pamasahe kag may ginahatag man nga pagkaon bilang bulig.
Apang nagikan sa Budapest padulong sa Vienna, Austria, may yara na sang bayad kag ginhatagan lamang sila sang 25 euro ukon kapin P1,400 nga discount.
Nagpabilin naman sa Ukraine ang iya mga amo bangud ang mga lalaki nga residente ang indi makagwa.
Suno diri, ginpahanugutan ini sang iya mga amo bangud mismo ang embahada kag ang iya agency na ang nagmando nga maghalin sa pungsod.
Naintindihan man ini sang iya amo kag ginhatagan siya sang sweldo para sa bulan sang Pebrero agud siya ang may magasto bangud wala naman sila sang kwarta.
Suno kay Tolentino, indi sini luyag nga magpauli sa Pilipinas bangud kadako sang iya nagasto kag luyag nga magpangita sang trabaho sa Spain.
Kun indi ini makakita sang trabaho sa Spain, kun sa diin may balay man ang iya mga abyan, magatilaw ini pangita sa iban nga mga pungsod.
