UNITED KINGDOM – Target sang pila ka Pinoy sa United Kingdom nga makaboto sang mas temprano agud wala sang huol sa pagpadala sang ila balota kag pagbaton sini sang embahada sang Pilipinas sa London.
Suno kay Bombo correspondent Ramil Isogon nagikan sa United Kingdom, kahapon niya nabaton ang envelope nga ginpadala sang embahada kag ini ang nagaunod sang absentee ballot.
Sa sulod sang brown envelope, may yara sang puti nga sobre ukon return envelope nga nagaunod sang balota nga amo ang igabalik sa embahada kun makaboto na sang presidente, bise presidente, senador kag partylist group.
Ang sobre ang may official seal man nagikan sa Comelec.
Ini ang igahulog sa post box kag makaabot na ini sa embahada sa sulod sang 24 oras.
Ginaadvise naman sang embahada nga maggamit sang black nga ballpen sa pagshade sang oval sa tupad sang pangalan sang kandidato.
Santo sa advisory, ang deadline sa pagbaton sang embahada sang balota amo ang Mayo 9.
Suno kay Isogon, ginapadala ang balota sang registered voters sa gwa sang London bangud mahal ang plete padulong sa amo nga ciudad kag mabudlay man ang pagpangita sang parkingan.
Efficient naman ang postal services sa UK kun sa diin makaabot ang mail sa sulod sang 24 oras.
