Amat-amat na nagapadulong ang mga tawo sa Burgos Public Cemetery sa ciudad sang Bacolod para manglimpyo.
Sa interview kay Jeff, manugbaligya sang kandila, may nagapadulong sa sementeryo para magtsekyar sang pantyon sang ila himata para palimpyohan.
Suno diri, wala pa gid man sang may nagabakal sang kandila sa karun apang may pila na ka mga nagpalimpyo kag nagpapinta sa mga pantyon sang ila himata.
Pahayag ni Jeff, kada tuig mas nagadutay ang mga nagapadulong sa Burgos Public Cemetery bangod kapin lima ka tuig na nga ginpa-untat ang pagbaton sang dugang nga ilubong didto samtang ang iban naman gintransfer na ang lulubngan sang ila himata.
Apang, ginalauman sini nga makaginansya bisan papaano sa Oktubre 31 kag Nobyemreb 1 kag 2 sa pagdagsa sang mga tawo.
Samtang, mas ginpakamaayo na lamang sang manugpinta sang pantyon nga si Toto nga limpyohan anay ang pantyon sang iya pamilya samtang nagahulat sang may luyag magpapinta sa iya.
Sa interview kay Toto, nagasukot sila sang P500 para sa pagpinta sang pantyon kag lettering, P300 para sa pagpinta lang kag P200 sa pagpalimpyo sa palibot sang pantyon.
Suno diri, kada tuig na sini nga ginahimo ang pagpanglimpyo kag pagpaminta sa pantyon kag siya nagapresyo depende sa kadakoon sang limpyohan kag sang pantyon nga pintahan.
