Gindumdom na lamang sang Negrense nga naglagaw sa Bacolod City Public Plaza ang anay maanyag nga dekorasyon sa lugar antes ang paskwa gikan sa mga naglabay na nga administrasyon, karun nga halos wala na sang Christmas decoration sa lugar.
Nahibaluan nga imbes sa nakaandan nga sa Public Plaza ginapatigayon ang lights on ceremony sang ciudad para sa pagsugata sang paskwa, nadisisyunan sang nanarisari nga opisina sang lokal nga gobyerno nga sa Bacolod City Government Center na lamang ini patigayunon sa Desyembre 2.
Ang ginapahayag rasun sa pagsaylo, ang bangod luyag sang mga opisyal nga mas maapresyar ang Christmas decoration ilabi na nga indi ini manami tulukon kun sa Bacolod City Public Plaza nga napalibutan sa karun sang mga ukay-ukay vendors.
Si Jerry Toniet, nga tumandok pa sa ciudad sang Sipalay ang 35 ka tuig naman ini nga nagatulutambay sa Bacolod Public Plaza.// Suno diri, sa nakaligad nga mga tinuig, nanamian ini sa kaanyag sang mga dekorasyon kag ang nasawayan lamang sini sang tinalikdan nga tuig amo ang indi paghimos sang mga decoration matapos ang Christmas season.
Pahayag sini nga bangod wala gilayon ginpanghimos ang mga christmas decorations kaangay sang mga christmas lights nga gintakod sa mga kahoy, ini ang nagabok nalang kag naguba, nga sa paglantaw sini mapuslan pa kuntani subong nga tuig kun gilayon nga ginhimos.
Apang subong nga halos wala na sang dekorasyon sa Plaza, nagakasubo man si Toniet ilabi na nga suno sa iya sa mga Christmas lights kuntani mabatyagan ang spirit sang Christmas.
Dugang pa sini nga Bacolod City lamang ang ciudad nga wala sang Christmas decoration ang plaza bangod halos tanan nga banwa kag ciudad sa Negros Occidental ang makitaan sang dekorasyon.
Aminado ini nga sa karun, ang Plaza ang nagaserbe na lamang nga landmark, bangod sa karun ang nagaserbe na nga nawong sang ciudad amo ang Bacolod City Government Center.
Ginalantaw man sini nga ginpili na lamang nga indi magbutang dekorasyon sa Bacolod City Public Plaza bangod ini ang doble na nga gasto para sa Bacolod City Government.
Samtang sa pihak nga bahin, nangin kaangay naman sang divisoria sa panulok sini ang Bacolod City Public Plaza.
