Nagdangat sa 50 ka mga indibidwal nga biktima sang sunog sa Purok King Fisher A, Barangay 16, Bacolod City, kahapon sang kaagahon ang nagapabilin sa duha ka kwarto sa ground floor sang Education and Training Center School 1 (ETCS-1) extension.
Sa interview sang Bombo Radyo Bacolod kay Barangay 16 Punong Barangay Jason Ligaya, mga 90 tanan ka indibidwal ang apektado sang sunog apang ang iban ang wala na nagtinir sa evacuation center bangud may yara man sila sang himata nga malapit sa lugar.
Suno kay Ligaya, madamo naman sang bulig nga nag-abot para sa nasunugan.
Ang Department of Social-Services & Development (DSSD) kag ang City Disaster Risk Reduction Management Office ang nakapadala na sang bulig.
Ginpahayag man sang punong barangay nga ang mga apektado ang makabaton sang financial assistance nagikan sa city government. Sa karun ang 50 ka indibidwal ang nagapabilin sa nasambit nga eskwelahan kag ginatatap na sang barangay.
