Pila sa mga residente sa Sitio Tamburong, Brgy. Bi-ak na Bato, sa banwa sang La Castellana, ang ginpili nga magpabilin sa puluy-an sa pihak sang mga evacuation efforts matapos sang natabo nga lahar flow.
Sa interview sang Bombo Radyo Bacolod kay Divine Grace Lindeo, residente sa lugar, nabatyagan nila ang mabaskog nga pagtay-og sang duta kag kasunod sini didto na nagdaludo sa sapa ang muddy stream flows ukon ang tubig ulan nga may kaupod nga abo.
Kaupod sini ang dalagakuan nga mga bato, nga maghimo naanod sang daludo upod sa pila ka mga utod nga puno sang kahoy.
Ini ang nagsupon naman sa idalom sang taytay nga nagresulta sa pag-overflow kag pag-awas sang lahar sa dalanon.
Bangod sini, temporaryo nga wala nalabayan ang dalan, kun sa diin nagdangat sa 25 ka dump trucks ang nahakot nga lahar.
Suno kay Lindeo, ginpanugyanan man sila sang mga kapulisan nga mag-evacuate na kagab-o, apang ginpili nila nga magpabilin bangod wala sang maga-atipan sa mga hinuptanan nga sapat.
Paathag sini nga sila ang magapanilag man sa sitwasyon sang sapa kag kun makita nga delikado na, sila ang nakahanda man nga mag-evacuate.
Suno kay Lindeo, ang sapa anga patay na kag nagakasudlan lamang sang tubig sa tion nga mag-ulan.
