Ginrescue ang pila ka mga residente sa ciduad sang Bacolod bangod sa pagbaha nga tuga sang pag-ulan dala sang Tropical Depression Kristine.
Nagconduct sang rescue operation ang Disaster Risk Reduction & Management Office (DRRMO) kag Bureau of Fire Protection- Bacolod; Pahanocoy Fire Sub-Station kag Special Rescue Force sa Prk. Maninihon, Brgy.Pahanocoy kasubong man nga ginrescue sang Sum-ag Fire Sub-Station ang mga residente sa Brgy. Sum-ag kag sila ang temporaryo nga magatinir sa Sum-ag Elementary School.
May yara man sang pagbaha nga nagluntad sa bahin sang Reclamation Area kag Brgy Sincang Airport.
Naekspeyensyahan man kaina sang aga ang mabug-at nga lakat trapiko bangod sa pagbaha sa dalanon sang ciudad.
Sa interview sang Bombo Radyo kay Earl Edward Ramirez, Chief of Operations sang DRRMO- Bacolod, padayon ang ila monitoring bisan nga nagnipis na ang ulan apang may mga area nga ginabaha pa.
Suno diri, nag-umpisa sila sa pagrescue kaina sang kaagahon kaupod ang BFP.
May yara sang nareport sa ila nga isa ka balay nga natumbahan sang dako nga kahoy kag may yara man sang isa ka babayi nga nag-agom sang minor injury.
Nagdangat naman sa walo ka pamilya ukon 29 ka indibidwal ang gin-evacuate sa Brgy Pahanocoy.
Samtang on stand by man ang mobile command center sa Brgy Taculing bangod indi ini makalibot sa mga flood prone areas nga kun basi mabasa ang generator set kag computer parts.
Pahayag sini, santo sa weather forecast maeksperyensyahan bilog nga semana ang pag-ulan kag ginkasubo man sini nga natuon sa highlight sang Masskara Festival ang maulanon nga panahon.
