Nagpasar sang duha ka mga fundamental resolutions sa Sangguniang Panlungsod si Councilor Renecito Novero, committee chair on Education, sa pinakaulihi nga session sang SP sa idalum sang administrasyon ni former Mayor Evelio “Bing” Leonardia sang Miyerkules.
Sa interview sang Bombo Radyo kay Novero, ang una nga resolution ang gin-address sa Kongreso, Senado kag Department of Education nga nagaduso sa pagreview sang K-12 curriculum sa Pilipinas kasubong man ang posibilidad sang kada integration sa pila ka mga education programs kaangay sang TESDA.
Nagpresent man ini sang omnibus resolution nga nagapahanugot sa tanan nga elementary kag secondary institutions, lunsay public kag private, nga magpatigayon sang face to face classes subject sa observance sang minimum health protocols bangud sa kadamo sang mga buluthuan sa ciudad nga nagasumiter sang request sa SP.
Suno kay Novero, at least once a week, sila ang nagapatigayon sang session apang kun kaisa nagatwice a week depende sa emerhensya kag sirkumstansya.
Suno sa iya, wala gid natabo nga wala sila nakapatigayon sang session kada semana kag pinakaulihi na sang ila batch ang session sang Miyerkules bangud ang masunod ang sa idalum na sang bag-o nga administrasyon.
Nagakalipay kag nagapasalamat man ini sa leadership si Vice Mayor El Cid Familiaran nga amu ang chairman sang Sangguniang Panlungsod bangud matawhay ang ila proceedings kag madasig ang pagpasar sang mga ordinansa kag resolusyon.
Ginpahayag man ni Novero nga kun serbisyo publiko ang istoryahan, ang iya loyalty ang indi sa partido kundi sa pungsod.
Suno sa iya, sila nga mga konsehal sa Grupo Progreso ang magasuporta kun maayo ang mga igaduso sang administrasyon apang kun kwestiyunable, indi man ini magduha-duha sa pagpamangkot.
Suno diri, himuon sini ang iya masami nga ginahimo kag ginapatihan bilang isa ka konsehal kag magaserbi sa mga pumulyo paagi sa iya attendance, performance kag pagduso sang mga resolusyon nga makabenepisyo sa mga pumuluyo kag makaapekto sa pungsod.
