Ginkumpirmar sang tagpamaba sang Bacolod City Police Office nga may yara sang minor reshuffling nga natabo sa mga station commander sang Police Station 9, Police Station 6, Police Station 5 kag Bacolod City Mobile Patrol Group.
Sa interview sang Bombo Radyo Bacolod kay BCPO spokesperson P/Lt. Col. Ariel Pico, ginpahayag sini nga natalana nga magpaidalom sa mandatory career schooling online ang mga pinuno sang nasambit nga mga police stations kag sang MPG.
Suno diri, ginadumili man sa Philippine National Police (PNP) ang pagpatigayon sang face-to-face classroom instruction.
Ginkumpirmar naman ni Pico nga ang magabulos nga hepe amo ang mga anay deputy station commanders.
Sa Police Station 9, ginbuslan ni Lt. Gilbert Batiles si Lt. Jonito Pastrana, nagbulos naman kay Capt. Elmer Bonilla bilang hepe sang Police Station 6 si Lt. Danilo Lauron kag si Lt. Melchor Tolentino naman ang nagbulos kay Capt. John Christopher Masangkay bilang hepe sang Police Station 5.
Samtang, wala pa sang may nagbulos kay Lt. Rondyl Tapang bilang pinuno sang MPG apang may yara lamang karon sang in-charge nga isa ka Sergeant.
Gin-athag ni Pico nga indi pa ini pwede mabutang bilang pinuno bangud dapat isa gid ka police officer ang magapamuno.
Samtang, ginkumpirmar naman ni Pico nga nagapabilin sa lima ang mga police personnel sang BCPO nga nagpositibo sa COVID-19.
Dugang pa sang tagpamaba nga yara sa “under observation” gihapon ang Bacolod Police Station 3 matapos nga nagpositibo sadto sa coronavirus ang duha ka mga priso.
