Ginapasalig sang pila ka mga top officials nga mahatag ang hustisya sa pagpatay kay Negros Oriental Governor Roel Degamo, sa press conference nga ginpatigayon sa Negros Oriental Police Provincial Office (NORPO).
Ini ang ginlakipan nanday House Speaker Martin Romualdez, Department of the Interior and Local Government (DILG) Secretary Benhur Abalos, Philippine National Police (PNP) Chief Gen. Rodolfo Azurin Jr. at Armed Forces of the Philippines (AFP) Chief of Staff Gen. Andres Centino.
Suno kay Abalos, nakibot gid si President Ferdinand “Bongbong” Marcos Jr. sang ginpahibalo sa insidente kag ini ang nagakasubo ilabi na nga abyan man sini si Governor Degamo.
Magluwas sa kakibot, makita man sini sa Presidente ang kaakig bangod sa makasilidhi nga krimen.
Si Presidente Marcos mismo ang nagmando nga dapat mahatagan sang hustisya ang kamatayon sang gobernador kag sang iban pa nga biktima.
Ginpasalig naman ni Abalos nga pinaagi sa pagbuligay sang tanan nga ahensya sang gobyerno, madakpan ang mastermind sa krimen kag mabalik ang kalinong sa Negros Oriental.
Sa pihak nga bahin nagpasalig naman si House Speaker Romualdez nga ginseguro nila nga magapabilin ang panggobyerno sa probinsya pinaagi sa pagpungko ni Vice Governor Carlo Jorge Joan Reyes bilang panibag-o nga gobernador.
Ginapasalig sini nga igabalik nila ang kalinong kag katawhayan sa probinsya sang Negros Oriental.
Panugyan man sini sa mga pumuluyo nga indi magkahadlok sa paghatag sang impormasyon bangod yara ang mga law enforcers agud magseguro nga indi na maliwat ang hitabo.
