Ginkumpirmar sang pinuno sang Bacolod Alliance for Commuters Operators and Drivers (BACOD), isa ka transport group nga nagpatigayon sila sang presscon kahapon para sa ila plano nga pagprotesta sa atubang sang Bacolod City Government Center sa Lunes, Mayo 8, agud nga ipabutyag ang mga problema nga ginapangatubang sang mga traditional jeepneys.
Sa interview sang Bombo Radyo kay Rody Agsam Cathedral, mapatigayon sila kaupod ang NBTC, kag UNDOC sang untat biyahe sa Lunes bangud sa indi pagrenew sang Land Transportation and Franchising and Regulation Board 6 sang ila mga special permit.
Suno kay Cathedral apisar sang LTFRB Memorandum Circular 2023-017 nga nagapahayag nga dapat ang tanan nga traditional jeepneys ang mahimo marenew ang special permits basta maayo ang kondisyon sa pagbiyahe sa dalanon apang wala ini ginbasehan sang LTFRB 6 kundi ginapamilit sang mga ini ang Department Order sang ahensya sa modernization program sang mga jeep.
Suno diri, ini ang luyag nila ipalab-ot sa pamunuan sang city government sang Bacolod.
Gin-aligar man sini nga mas ginapaburan sang syudad ang kooperatiba sang mga modernized jeepney sang sa ila nga linibo ka mga operators kag drivers sang traditional jeepneys.
Updan sang mga drivers kag operators ang patigayunon nga untat-biyahe sa Lunes.
Pagkatapos sa NGC plano man sang mga ini nga magprotesta man sa Iloilo City kaupod ang transport group sa syudad sang Iloilo sa opisina sang LTFRB 6 agud ipalab-ot man ang ila nga mga reklamo.
