Nagreklamo ang pila ka mga vendors nga nagabaligya sa sidewalk sang Libertad Public Market bangud indi sila makapwesto sa annex building nga sayluhan sang city government sa ila.
Kaina sang aga, ginpatigayon ang raffle agud madeterminar kun sanday sin-o ang maga-okupar sang 114 ka block ukon pwesto sa annex building sang Libertad Public Market.
Apang nagreklamo ang pila ka dumaan nga market vendors sa Libertad bangud wala ang ila ngalan sa iga-raffle.
Santo sa bag-o nga pagsulundan, dapat residente kag voter sa Bacolod ang vendor gani nagareklamo ang mga bulantera nga taga-out of town.
Nagareklamo man ang mga ini bangud tungaon sang duha ka vendor ang isa ka block.
Sa interview sang Bombo Radyo kay Lyn Dela Paz, presidente sang Federation of Bacolod City Vendors Association, nasala na ang mga ngalan antes ang raffle bangud ginlista ang mga ini gani mahimo nga wala ang mga ini sang naglistahanay.
Bangud pandemic sang ginlista ang mga vendors, mahimo suno sa iya nga wala nakabaligya ang mga wala sila sa listahan ukon ginpaarkilahan sa iban ang ila nga pwesto.
Ginpahayag naman ni Mayor Alfredo Benitez sa ila nga agwantahon lang ang gamay nga pwesto bangud ginapaigo sang city government ang mga vendors.// Bangud 300 ka ngalan ang yara sa lista, indi tanan sila ang maka-okupar sang 114 ka pwesto.
Gin-athag man sini nga isa lang ka vendor ang maga-okupar sang isa ka block kag indi magshare ang duha ka vendors.
