Magapatigayon sang demonstrasyon ang Bagong Alyansang Makabayan sa ciudad sang Bacolod alas 2:00 karun sa hapon agud iproklamar ang ila mga demanda sa gobyerno kaupod ang nagkalain-lain nga sektor kadungan sang labing una nga State of the Nation Address ni President Ferdinand “Bongbong” Marcos Jr.
Suno kay Kilusang Mayo Uno Secretary General Noli Rosales, sila ang maga-assemble sa Rizal Park alas 12:00 sang udto kag pagka-ala 1:00, magamartsa ang mga ini padulong sa Fountain of Justice kag magalibot sa Catholic Cathedral sa Plaza.
Pagka-alas 2:00 sang hapon suno kay Rosales, magapatigayon sila sang hublag protesta kun sa diin ila igaproklamara ang ila mga demanda kaupod ang nagkalain-lain nga sektor sa Fountain of Justice sa Old City Hall.
Suno diri, luyag nila mahibaluan ang mga plano sang Presidente sa ginapangatubang sa karun nga krisis sang Pilipinas sa ekonomiya kag ang pagsaka sang inflation.
Paagi sa pagprotesta, suno sa iya, ila ginachallenge ang administrasyon kun ano ang ila paglantaw sa mga issue sa oungsod bangud indi maathag ang mga plano ni Marcos Jr. sang siya ang nagapangampanya pa lamang bangud “pag-isa” lamang ang iya plataporma.
Nagalaom ini nga malakip sa SONA ni Marcos ang nagalala nga krisis sa ekonomiya, ang mga hingyo sang mga mamumugon, mga frontliners kag mga mangunguma.
Luyag man sini mahibaluan kun paano i-address sang Presidente ang drug war kag korapsyon sa pungsod.
