Kasunod sang pagsungka sang mga miyembro sang New People’s Army (NPA) sa mga suldado sa southern Negros kahapon, ila man gintudlo sa mga otoridad ang ginlubngan sang anay kaupod sa hublag sa Barangay Riverside, Isabela, Negros Occidental.
Sa interview sang Bombo Radyo Bacolod kay Police Captain Joseph Partidas, hepe sang Isabela Municipal Police Station, natigayon nila nga makutkutan ang kalabira matapos nga magcoordinate sa ila ang 62nd Infantry Battalion matapos ginsugiran sila sang nagsungka nga miyembro sang komunista nga grupo nga may ginlubong nga tawo sa nasambit nga lugar kag ginaalegar nga ginpatay sang kaupod nila sa NPA.
Ginkilala ang nakutkutan nga kalabira kay Randy Garsola, 34 anyos, single, lalaki kag residente sang Purok Malibog, Sitio Mahupaho, Barangay San Agustin, Isabela kag ginapahayag nga ginlubong sang tuig 2018.// Suno kay Partidas, kaupod nila sa pagkutkut ang katapo sang 62nd IB, Scene of the Crime Operatives, barangay officials sang Barangay Riverside kag ang gina-aligar nga amay sang bangkay nga ginkilala kay Winy Garsola.
Nadala naman sa Nalagon Funeral Homes kag ginkuhaan naman sang SOCO sang standard DNA sample ang bangkay agud makompirmar kun matuod nga anak ini ni Winy Garsola.
