Nagapati si Negros Occidental Third District Rep. Kiko Benitez nga ang natabo nga pagpili sang kapin 186 ka mga kongresista kay Marinduque Rep. Lord Allan Velasco bilang speaker sang House of Representatives kahapon ang nagapakita nga gusto sang majority nga si Velasco ang magpungko sa pwesto.
Sa interview sang Bombo Radyo kay Benitez, ginpahayag sini nga sa kapin 299 ka mga miyembro sang Kamara, 120 ka mga kongresista ang nagpadulong sa Celebrity Sports Plaza sa Quezon City samtang ang iban ang nagtambong naman paagi sa zoom agud matigayon ang session.
Suno sa iya, 186 ka mga kongresista ang nagboto kag nagsuporta kay Velasco bilang House Speaker kag nalapawan sini ang required nga 151 ka boto.
Sa pagpili kay Velasco sa speakership, nagboto man ang 186 ka mga mamalidha nga batunon ang motion ni Buhay party-list Rep. Lito Atienza nga ideklarar nga bakante ang posisyon sang House speaker nga ginauyatan ni Taguig-Pateros Representative Alan Peter Cayetano.
Pagkatapos sang eleksyon, gilayon nga nagsumpa si Velasco.
Suno sa Negros Occidental representative, ginboto sini si Velasco bangud sa term sharing agreement sang duha nga ginbroker ni Presidente Rodrigo Duterte 15 ka bulan na ang nakaligad.
Suno sa iya, natapos na ang tion ni Cayetano bilang House Speaker kag nagakadapat nga ihatag na ini kay Velasco santo man sa ila ginhisugtan.
Nagapati man ini nga sa mga ginahimo nga tikang ni Cayetano, wala ini sang plano nga manaog sa pwesto apang mas nagapangibabaw suno diri, ang mandato sang majority sa Kongreso.
Nagapasalamat man ini nga na-elect na si Velasco kag nagalaom nga magsunod si Cayetano sa mandato sang kadam-an.
Nagalaom man ang kongresista nga matapos na ang away sa Kamara bangud kinahanglan nga mapasar ang 2021 national budget sa madasig nga tinion.
Subong nga adlaw, magapatigayon ang Kamara sang special session ukon budget hearing agud diskusyunan ang nahanungod sa 2021 national budget.
