Wala nakapugong sa mga persons deprived of liberty (PDLs) ang pag-eskwela sa elementarya, high school kag kolehiyo bisan pa nga yara sila sa sulod sang Canlaon City Jail.
Sa interview sang Bombo Radyo kay Jail Inspector Jumbo Abad, jail warden sang Canlaon City Jail, may 24 ka mga PDL ang nagpa-enroll sa elementary, 13 sa High School kag apat sa college sa kurso nga Bachelor of Science in Business Administration.
Suno diri, ang apat ka college students ang lunsay mga lalaki kag naga-edad sang 18, 19, 20 kag 22 anyos.
Sa karun, ini ang una nga kahigayunan sa city jail nga may apat ka PDL nga estudyante sang kolehiyo.
Sa sulod sang isa ka semana tag tatlo ka beses nga nagapadulong ang mga manunudlo sa city jail para sa elementarya kag high school apang sa college, halos adlaw-adlaw may manunudlo nga nagatudlo sa ila.
Kalakip na ang school director sang St Joseph College ang nagatudlo man sa mga PDL.
Suno kay Abad, isa ka maayo nga butang nga nagpahungot ang buluthuan nga magabaton sa mga PDL bilang ila nga estudyante.
Face to face kag modular ang sistema sang ila nga klase kun sa diin ginhatagan sang area ang mga estudyante kag manunudlo nga ila patigayonan sang klase kag pagtuon.
Pahayag ni Abad, sa kada klase sang mga PDL may jail personnel nga nagabantay kasubong man nga ginabantayan ang paggamit sang mga PDL students sang computer nga ginpa-avail sa ila sang city jail.
Isa man ka maayo nga butang nga may lima ka jail personnel ang naggraduate sa kurso nga Bachelor of Secondary Education (BSEd), nga amo nagabulig sa mga PDL sa ila pagtuon.
Mensahe ni Abad, nga bisan PDL magtinguha kag magpisan sa pag-eskwela agud nga kun makagwa na, may yara na sila sang deploma nga gina-uyatan nga sila nakatapos sa pag-eskwela.
