Aminado ang presidente sang Bacolod City Public School Teachers Federation nga may mga manunudlo nga naglain ang buot matapos madelay ang paghatag sang annual medical allowance.
Nahibaluan nga santo sa guidelines dapat mahatag na sa mga Department of Education personnel ang subsidize health maintenance organization (HMO)-type benefits antes natapos ang bulan sang Agosto.
Sa interview sang Bombo Radyo Bacolod kay Richard Gelangre, ang benepisyo ang kuntani ihatag na sang 2024 apang wala nadayun, kag sang damlag lang ginlobby sang Alliance of Concern Teachers nga ginsuportahan man ni Budget Secretary Amenah Pangandaman.
Sa deklarasyon dapat mahatag ang HMO sumugod Agosto 21.
Antes paman sini, may gin-issue na nga memorandum nga papilion ang mga manunudlo kun luyag nila nga P7,000 cash ang indibidwal nga batunon ukon tingob nga iprocure sang division office.
Suno diri, nakapili na ang mga manunudlo nga tingob na lamang nga maga-bid ang DepEd division of Bacolod, apang may naggwa nga memorandum nga nagapahanugot sang individual availment.
Pahayag ni Gelangre nga ini ang ginhimo agud indi mabudlayan ang mga manunudlo nga yara sa mga geographically isolated areas.
Suno kay Gelangre, una naman nga ginhatag ang P7,000 sa mga manunudlo nga may HMOs na kaangay sang gikan sa ila bana nga nagatrabaho abroad ukon seafarers.
Samtang ang iban nga DepEd division ang naghatag naman individually, gani madamo sang mga manunudlo ang nagsunggod.
Sa mga individual availment, sila na ang bahala nga mangita sang HMO, apang dapat kompleto ang mga kinahanglan nga medical benefits sa package, santo sa guidelines.
Samtang ang mga manunudlo ang required naman nga magsumiter sang liquidation antes magtakop ang tuig.
Bangod sa mga pagbag-o sa ginpagwa nga memo, naghatag sang allowance ang DepEd Bacolod sa mga manunudlo kun luyag nila nga mag-upod sa tingob nga procurement sang division ukon pilion ang individual availment.
