Respetuhon ni Punong Barangay Jerry Tingson sang Barangay Estefania, ciudad sang Bacolod kun ipasar sang Kongreso ang hagna nga magapostpone sang Barangay and SK Elections nga natalana kuntani sa Disyembre 5 subong nga tuig.
Sa interview sang Bombo Radyo kay Tingson, valid man ang rationale sa postponement bangud may savings ang gobyerno nga P8 billion.
Suno diri, malipay ang sitting president nga may savings nga P8 billion para sa recovery sang ekonomiya.
Aminado si Tingson nga ang mga barangay officials ang nangin frontliner nga makabulig sa local kag national officials.
Sa idalom sang Duterte administration, madamo ang trabaho sang mga barangay officials kaangay sang clearing operations kag ginsundan sang COVID pandemic.
Suno sa punong barangay, dehado ang mga pumuluyo kun non-performing ang mga barangay officials apang ara sa DILG ang yabi sa pagpressure sa barangay officials nga magperform sang maayo.
Wala naman sang nakita nga problema si Tingson kun dayunon ang eleksyon bangud ini ang preparado.
Suno sa barangay official, magadepende sa Kongreso kun aprubahan nila ang hagna kag respetuhon sang mga barangay officials ang ila nga desisyon.
