Natrap sa ibabaw sang atop ang pila ka residente sang Brgy Singcang Airport, Bacolod City bangod sa baha.
Suno kay Solen, alas- 4:00 kaina sang kaagahon, naglili ini sa bintana sang iya boarding house kag nakita sini nga mataas na ang tubig.
Suno diri, ginguba na lang nila ang bintana kag nagsaka sa ibabaw sang atop samtang nagahulat nga marescue.
Apang, mas ginpili ni Solen nga magtabok sa mga atop sang balay agud makagwa sa lugar kag makalab-ot sa highway.
Suno kay Solen, may kapin 50 pa ka mga residente ang nabilin nga nagtinir sa ibabaw sang atop kag kalabanan didto mga babayi.
Pahayag sini, siya residente sang Kabankalan City nga nagaboard lang sa ciudad sang Bacolod kag subong pa lamang sini naeksperyensyahan nga matrap sa baha.
Ginpili man sini nga indi na magpa-ihibalo pa sa iya pamilya kun ano ang sitwasyon sini agud indi sila mabalaka.
Samtang… wala na napunggan sang residente sang Purok Mars, Brgy Singcang Airport, Bacolod City nga mangin emosyonal matapos maubos basa ang tanan sini nga gamit sa sulod sang balay.
Sa interview sang Bombo Radyo kay Francis Franco, nagsulod ang tubig sa ila balay kag nagdesisyon ini nga magsaka na sa ikaduha nga panalgan.
Apang, padayon nga nagasaka ang tubig kag nagdesisyon na lang ini nga magsaka sa ibabaw sang atop.
Nagtinir ini sa ibabaw sang atop sa sulod sang duha ka oras samtang ginalantaw ang balay sini nga ginsulod na sang baha.
Suno kay Franco, napilas pa ini sa lansang sang nagsaka sa hagdan nga ila gingamit agud makasaka sa atop.
Pahayag sini, sa 40 ka tuig sini nga pag-istar sa lugar, ini pa lamang sini naeksperyensyahan nga tuman ka taas ang baha sa Purok Mars.
