May pila ka mga resolusyon nga ginfile sa Sangguniang Panlungsod sang Bacolod may kaangtanan sa tikang angot sa pagtimbook sang presyo sang produktong petrolyo.
Isa sa mga nagfile sang resolusyon amo si Councilor Wilson “Jun” Gamboa.
Suno sa konsehal, ang resolusyon ni Councilor Bobby Roxas ang limitado lamang sa tikang nga mahimo sang Department of Trade and Industry sa produktong petrolyo.
Ang kay Councilor Em Ang ang localized nga pagtukod sang monitoring council.
Samtang ang iya naman ang mas malapad nga scope bangod ginlakip sini ang mga basic essential commodities kaangay sa pagkaon kag bulong sa pagpatigayon sang price monitoring.
Luwas sa DTI kag Department of Energy, ginlakip sini sa enforcement ang Philippine National Police.
Kun sa diin ginaduso sini ang pagcrackdown sa mga negosyante nga nagapatigayon sang profittering, hoarding kag price manipulation.
Indi ini kumpormi sa nangin pahayag ni Energy Secretary Sharon Garin nga wala ini sang mahimo bangod ini ang covered sa oil deregulation law.
Suno kay Gamboa, ang nasambit nga mga bayolasyon ang nagalapas sa National Law.
Aminado ini nga ang fuel prices ang nakadepende sa World Market, apang may-ara sang average maximum markup, kag indi pwede ang sobra sobra nga pagpasaka sang presyo.
Suno naman kay Councilor Em Ang, luyag sini nga maseguro paagi sa Local Monitoring Council, nga wala sang hoarding, profiteering kag unfair practices nga matabo kasunod sang pagsaka sang mga presyo sang produktong petrolyo.
Sila ang magakoordinar sa DTI kag DOE, agud maseguro nga patas ang mangin pagpasaka sang presyo kalakip na sa mga nagapanguna nga balaklon.
