Nagtipon ang pila ka sektor sa atubang sang Fountain of Justice sa Old Bacolod City Hall kaina sang aga agud magpatigayon sang protest movement antes pa ang State of the Nation Address (SONA) ni President Ferdinand ‘Bongbong’ Marcos Jr.
Ang mga nagtipon ang ginabanta nagdangat sa masobra 600 gikan sa Kilosang Mayo Uno, Bagong Alyansa Makabayan, Kabacod Negros Transport Coalition (KNETCO), National Federation of Sugar Workers, Kadamay Negros kag Kabantaan Partylist.
![](https://img.bomboradyo.com/bacolod/2024/07/SONA-RALLY-1.jpg)
Sa interview sang Bombo Radyo Bacolod kay Noli Rosales, secretary general sang Kilosang Mayo Uno, ginapabugal gid sang Marcos Administration ang Bagong Pilipinas apang sa likod sini tuman gihapon ang kapigaduhon kag kadam-an ang wala gid makabatyag sang pagbag-o.
Ginabatikos man nila ang tuman nga pagsaka sang bili sang mga balaklon, manubo nga sweldo sang mamumugon, ang gina-alegar palpak nga public utility vehicle modernization program kag wala masabat nga panawagan nga dapat scientific na ang agriculture, ang wala napatuman nga P20 nga presyo sang bugas.
![](https://img.bomboradyo.com/bacolod/2024/07/SONA-RALLY-2.jpg)
Ginakondenar man sang mga ini ang P20 million budget para sa SONA sa pihak sang tuman ka damo nga naga-antos kaangay sang mga nabagyuhan nga nagakinahanglan sang bulig.
Panindugan sang mga ini nga kuntani ang budget ang gingamit nalang para sa mas labi nga nagakinahanglan.
Ginakondenar man nila ang away sa politika sa tunga sang pamilya Duterte kag pamilya Marcos, nga imbes resolbahon ang problema sang pungsod mas ginauna pa ang pamolitika.
Matapos ang speech sang ila mga speakers sila ang temprano man nga nagpull-out agud makatutok sa pagpamati sa SONA.
![](https://img.bomboradyo.com/bacolod/2024/07/SONA-RALLY-3.jpg)