Ginpahayag sang Parish Priest sa St. John the Baptist Church sa Barangay Punta Taytay nga may mas importante nga pinaagi sa pagdumdom sa mga minatay magluwas sa pagbisita sa patyo.
Suno kay Fr. Agustine “Agot” Hinayan, natural na nga sentimental ang mga Pilipino sa paghatag sang bili sa close family ties kag ini ang tubtob pa sa minatay.
Madugay naman nga tradisyon ang pagduaw sa mga nagtaliwan nga himata sa sementeryo, apang ginpakigbahin ni Fr. Hinayan nga mas may-bilidhon pa nga mahimo nga mas kinahanglan sang minatay.
Paathag sini nga nagabulag ang kalag sa lawas kun ang tawo ang mapatay, apang bangod ginakilala sang mga kristiyano nga sagrado ang lawas, gani masami nagahalad sang kandila, bulak ukon pagkaon ang mga Pilipino sa tion sang Piesta Minatay.
Apang suno kay Fr. Hinayan, mas kinahanglan sang kalag ang espiritwal nga butang kaangay sang paghalad sang misa ukon pangamuyo para sa kalag.
Bangod sini, magapatigayon ini sang 3-days mass sa St. John the Baptist Church sa Barangay Punta Taytay, Bacolod City.
Pahayag ni Fr. Hinayan nga sa Oktubre 29 tubtob 31, magaduaw ini alas-5:00 sang hapon sa sementeryo kun sa diin magabutang sang bulak, kandila kag dugangan niya pa ini sang misa para sa kalag sang mga minatay.
Bangod sa indi mahimo ang may physical presence, ini nalang ang magapadulong sa sementeryo kag iga livestream.
Paathag sini nga magluwas sa pagrespitar sa sentimyento sang buhi, dapat man nga ihatag ang kinahanglanon mismo sang kalag.
Dugang pa sini nga may misa man sila nga buhaton sa Nobyembre 1 kag 2 alas-6:30 sang aga samtang alas-10:00 naman sang aga sa Sacred Heart Memorial nga ila gihapon nga igalivestream.
Nagalaom si Fr. Hinayan nga makabalik na sa normal ang sitwasyon sa masunod nga tuig agud liwat na nga mabuhat ang atun nga nakaandan.
