Nagalaom ang isa ka taxi driver sa ciudad sang Bacolod nga maaprubahan sang Land Transportation Franchising and Regulatory Board (LTFRB) ang ginaduso sang Philippine National Taxi Operators Association nga pasakaon ang flag down rate sa P60 nagikan sa P45 bangud sa asod-asod nga pagsaka sang presyo sang gatong.
Sa interview sang Bombo Radyo kay Leandro Canillo, nagabyahe ini sang 12 tubtob 13 ka oras kada adlaw kag may mga tion nga pigado gid kag may yara man tion nga sila ang makabawi-bawi.
Suno sa iya, nagadangat sa P700 tubtob P1,000 ang iya ginabayad nga renta sa taxi.
May yara ini sang duha ka mga kabataan kag hinablos nga ginapa-eskwela kag kun kaisa, makahatag ini sa iya asawa sang P200 tubtob P500 agud ibakal sang bugas kag kinahanglanon sang panimalay.
Sa karun P40 sa gihapon flag down rate sang taxi nga ginamaneho sini bangud wala ini napa-adjust sang operator.
Suno kay Canillo, nagahingyo ini nga maaprubahan sang LTFRB ang P60 nga flag down rate nga ila ginaduso bangud madugay na nila ini nga ginapangabay.
Suno diri, ini lamang ang ila ginasaligan nga makuhaan sang palangabuhian gani kun ini ang maaprubahan kag sila ang makapa-upgrade, dako na ini nga bulig para sa ila.
