Magapatigayon sang State of the Transport Address (SOTA) ang pila ka mga transport group sa Lunes antes ang natalana nga State of the Nation Address (SONA) ni President Ferdinand ‘Bongbong’ Marcos Jr. sa Hulyo 22.
Sa interview sang Bombo Radyo Bacolod kay Kabakon Negros Transport Coalition Incorporated (KNETCO) President Lilian Sembrano, ang mga transport groups kaangay sang grupo sang mga traditional jeepneys, tricycle kag pati na pila ka mga commuters ang magatipon antes pa ang alas-7:00 sang aga sa Lunes sa Bacolod City Government Center Grounds.
Ang SOTA ang patigayunon nationwide sa nagkalainlain nga bahin sang Pilipinas.
Suno kay Sembrano, talakayon sa SOTA ang sitwasyon sa karun sang transportation sector; sitwayon sang mga consolidated jeepney drivers and operators, partikular na ang mga gindagdagan sang show cause order; agenda para sa transport sector sang Region 6 may kaangtanan sa public utility vehicle (PUV) Modernization Program.
Ini ang luyag nila nga mapalab-ot sa mga local government units (LGUs) kag kay Presidente Marcos antes paman ang SONA.
Pahanumdom ni Sembrano nga sa State of the City Address (SOCA) ni Bacolod City Mayor Alfredo ‘Albee’ Benitez kag State of the District Address (SODA) ni Congressman Greg Gasataya, wala gid nila nabatian nga gin-address ang mga concerns sang transport sector.
Panawagan sini sa iban pa nga yara sa sulod ukon luyag magsuporta sa sektor sang transportasyon, nga updan kag tambungan ang ila patigayunon nga SOTA sa Lunes.
