Ginalauman na sang pila ka transport group sang traditional jeepneys sa ciudad sang Bacolod nga maga-abot ang tion nga indi na magahatag sang extension ang gobyerno sa Public Utility Vehicle (PUV) consolidation.
Kahapon, gindeklarar na ni LTFRB chairman Atty. Teofilo Guadiz III, nga sila ang indi na magahatag sang extension, nga ginsegundahan man ni President Ferdinand “Bongbong” Marcos Jr. nga nagbilin sang facebook post nga “Wala na pong extension”.
Sa interview sang Bombo Radyo Bacolod kay Albert Villanueva, chairman sa Sentrong Samahan ng mga Tsuper at Operators Negros (SSTONE), makapila na maghatag sang extension ang gobyerno sa consolidation process padulong sa PUV Modernization Program.
Gani gina-akespektar na sang SSTONE kasubong man sang Federation of Bacolod City Drivers Association (FEBACDA) nga wala na sang extension, gani sila ang una na nga nagproseso.
Suno diri, yara na sila sa last step sang consolidation process.
Sa bulig sang Bacolod City Government, gintugutan sang Land Transportation Franchising and Regulatory Board (LTFRB) Region 6 ang SSTONE kag FEBACDA nga magtukod sang kaugalingon nga kooperatiba, bangod indi nila luyag magsulod sa existing na nga kooperatiba kag korporasyon.
Sa pagtukod sang kooperatiba, ang FEBACDA kag SSTONE ang gilayon naman nga madisolve.
Panindugan ni Villanueva nga ang luyag gid nila nga mapahanugutan ang rehabilitation sang mga traditional jeepneys.
Apang suno diri, nagsugot na lamang sila sa pagsulod sa consolidation agud makabyahe pa ang ila mga jeepney units matapos ang deadline.
Paathag sini nga wala sang phaseout sa traditional jeepneys, bangod kun magpaconsolidate mahatagan pa sang ginabanta 24 ka bulan agud makabyahe.
Samtang ang mga unconsolidated jeepneys naman ang dumilian na sa dalan sumugod sa Mayo 1.
Aminado ini nga sila ang yara pa lamang sa first step sa pagsulod sa PUV Modernization, kag ang consolidation ang ginhimo lamang nila agud indi madulaan sang palangabuhian ang mga drivers kag operators.
Suno diri, wala pa sa diskusyon ang natuhoy sa pagbakal kag pagdala sang modernized jeepneys, nga ila na lamang paligban sa masunod.
