Ginaproseso na sang Sentrong Samahan ng mga Tsuper at Operators Negros (SSTONE) kag Federation of Bacolod City Drivers Association Incorporated (FEBACDA) ang pagtukod sang kaugalingon nga kooperatiba agud lamang sila ang makapadayun sa pagbyahe sang mga traditional jeepney units.
Sa interview sang Bombo Radyo Bacolod kay Albert Villanueva, Chairman sa SSTONE, okay sa ila nga magpaconsolidate apang ang ginapakigbato nila humalin pa sadto amo ang mapahanugutan ang individual franchise.
Apang bangod natapos na ang consolidation deadline sang Disyembre 31, 2023, kag makabig na nga colorum ang mga wala nakapaconsolidate sumugod Enero 1, 2024, nagdesisyon sila nga magtukod nalang sang kaugalingon nga kooperatiba agud indi madulaan sang palangabuhian ang mga traditional jeepney drivers kag operators.
Suno kay Villanueva, ang mga consolidated jeepneys ang pahanugutan pa nga makabyahe sa duha tubtob tatlo ka tuig, kag mahimo pa nila mapakigbato ang ila mga panawagan sa nasambitan nga tion.
Sa karun ginaproseso na nila ang mga papelis kag sa bulig sang Bacolod City Government, ginatumod pa sini kun kinahanglan nila nga ipasa ang papelis sang kada jeepney drivers nga magasulod sa ila nga kooperatiba ukon listahan na lamang sang mga pangalan.
Suno diri, apisar nga ang prangkisa sang mga operators ang masulod sa kooperatiba, ginapasalig sini nga ila ibalik sa mga drivers ang personal nila nga unit inkaso sila ang magdesisyon nga mag-untat.
Gani kaangay lamang nga sila gihapon ang tag-iya sang ila mga jeepney units kag indi sa ginakahangaw-an nga ini ang yara na sa kamot sang kooperatiba, gani gilayon man nga gin-ugyunan sang tanan nila nga miyembro.
Suno diri, luyag nila nga sa ila kooperatiba matingob ang mga traditional jeepney drivers nga nagpaconsolidate, agud tubtob sa ulihi, madeterminar nga sila ang grupo sang mga anay traditional jeepney drivers kag operators sa ciudad sang Bacolod.
Suno diri, sa kabug-usan 1,858 traditional jeepney units ang ila miyembro, apang bisan 1,500 lamang gikan sa mga ini ang magsulod sa kooperatiba ang makasarang na sa pagserbisyo sa mga commuters sang Bacolod City.
Welcome naman nga magsulod sa ila kooperatiba bisan ang mga traditional jeepney drivers gikan sa iban nga transport group.
Suno kay Villanueva, sila ang nagapangita lamang sang win-win solution kag sa nabilin nga tiyempo, tinguhaan man nila nga mapaayo ang sistema sa modernization program.
