Nagalaom ang Land Transportation Franchising and Regulatory Board nga masanagan ang mga transport groups sa probinsya sang Negros Occidental angot sa Public Utility Vehicle Modernization Program.
Kaina sang aga, gin-award sang LTFRB sa Alliance for Peace and Sustainable Development Transport Cooperative (APSDTC) ang katapusan nga ruta sang modern jeep sa ciudad sang Iloilo, paagi sa isa ka programa nga ginpatigayon sa isa ka mall diri sa ciudad sang Bacolod.
Ang kooperatiba ang ginhatagan sang Molo-Iloilo City Proper nga ruta.
Ang ceremonial awarding sang notice of selection para sa APSDTC ang pinakauna sa Pilipinas bangud ang mga miyembro sang kooperatiba ang mga leftist nga nagbalik sa sabak sang gobyerno.
Diri naman sa Bacolod ginpatigayon ang ceremonial awarding bangud madamo diri ang wala nagapati sa modernization program sang gobyerno.
Suno kay LTFRB Region 6 spokesperson Atty. Salvador Altura, ginhatagan man sang imbitasyon ang UNDOC, BACOD kag SSTONE angot sa pagporma sang kooperatiba.
Nagalaom naman si Altura nga magakambyo ang panan-awan sang mga transport groups angot sa modernization program paagi sa mga testimoniya nga ila nabatian angot diri kadungan sang programa.
Suno naman kay LTFRB Region 6 director Richard Osmena, ginalantaw nga mangin bastante na ang modernized jeepneys sa ciudad sang Bacolod sa katapusan sang tuig.
Bangud sini, padayon ang ila nga pag-engganyo sa mga operator nga magtukod na sang kooperatiba bangud sila ang buligan. SAMTANG…Nagapabilin ang pagpati sang pila ka transport groups sa ciudad sang Bacolod kaangay sang Sentrong Samahan ng mga Tsuper at Operators – Negros nga maextend ang pagbyahe sang traditional jeepneys sa baylo nga lunsay nalang modernized jeepneys ang pahanugutan nga makabyahe sugod sa masunod nga tuig.
Suno kay SSTONE secretary-general Junjun Asis, nagpamati sila sa presentasyon sa awarding sang katapusan nga ruta sang modern jeep sa ciudad sang Iloilo kun sa diin sila ang gin-engganyo sang LTFRB nga mag-intra sa modernization program bangud nagsuporta man diri ang leftist group sa ciudad sang Iloilo.
Suno diri, napahumok man ang grupo nga nagapamatok sa programa sa tayuyon nga pagkumbinsi gani amo man ini ang ginpresentar sa mga transport groups sa Negros Occidental.
Wala naman nakatambong sa programa ang iban nga transport groups sa ciudad.
Suno kay Asis, maayo man nga sila ang nakapamati apang aminado ini nga lain man ang mga grupo sa Iloilo sangsa diri sa Bacolod.
Sa pihak sang presentasyon, ang solusyon naman sang city government sang Bacolod ang ginahulat sang SSTONE.
Una na nga ginpahayag ni Bacolod City Mayor Albee Benitez nga dako ang tsansa nga maextend ang prangkisa sang traditional jeepneys tubtub sa masunod nga tuig bangud madamo pa ang kulang nga modernized jeepneys sa mga ruta sa Bacolod.
Suno diri, congested na gid ang dalagan sang trapiko bangud sa madamo nga dalagko nga salakyan ukon ang modernized jeepneys apang magapadayon sa pagbyahe ang traditional jeepneys.
Nagatest naman subong sang byahe ang mga electric jeepneys nga may ruta Punta Taytay Central Market apang ginapanilagan pa ang progress sini.
