Wala sang plano ang pila ka transport groups sa Negros Occidental nga maghingyo nga pasakaan ang pamasahe sa pihak sang sunod-sunod nga sinemana nga nagasaka ang presyo sang gatong.
Suno diri, problema sang kabilugan ang pagsaka sang presyo sang produktong petrolyo bangud nagaresulta man ini sa pagsaka sang presyo sang nagapanguna nga balaklon bilang domino effect.
Apang bisan indi naman sila magpasaka sang pamasahe, talalupangdon naman ang pagsaka sang mga balaklon.
Bangud sini, ginatugyan na sang transport group sa gobyerno kun ano ang mahimo sini nga solusyon angot sa pagsaka sang presyo sang basic necessities and prime commodities.
Suno kay Villanueva, nag-istoryahanay na sila sang Federation of Bacolod City Drivers Association (FEBACDA) kag sila nakasugtan nga ang pagpasaka sang pamasahe ang solusyon sa problema sa pagsaka sang presyo sang diesel kag gasolina.
Suno diri, may mga pamilya man sila nga nagapamasahe nga maapektuhan kun magsaka ang pletehan.
Suno kay Villanueva, mahimo nga mabawi nila ang gasto sa gatong kun pasakaan ang pamasahe apang dako man gihapon ang galastuhan sa sulod sang balay kun magmahal ang mga balaklon.
Panindugan sang transport leader, dapat gobyerno ang magahimo sang solusyon para diri bangud may iban man nga negosyo nga nagagamit sang gatong nga apektado.
Ginapangita man sang mga ini ang ginpresentar ni President Bongbong Marcos sang nagapangampanya pa ini nga magapatuman sang blanket subsidy sa gatong.
Magluwas sa pagsaka sang presyo sang gatong, nagaproblema man ang traditional jeepney operators kag drivers bangud luyag gid sang gobyerno nga dulaon na sila sa dalan.
