Indi pabor ang isa ka tricycle driver nga himuon alas-8:00 sang gab-i tubtob alas-4:00 sang kaagahon ang curfew sa ciudad sang Bacolod nagikan sa alas-10:00 sang gab-i tubtob alas-4:00 sang kaagahon.
Nahibaluan nga sa executive order nga ginpagwa kagab-i ni Bacolod City Mayor Evelio “Bing” Leonardia kun sa diin nagapalawig sa ika-apat nga tion sang modified general community quarantine (MGCQ) sa ciudad, nakasaad diri nga may yara sang proposal nga himuon alas-8:00 sa gab-i tubtob alas-4:00 sa kaagahon ang curfew apang kinahanglan pa nga mag-agi sa Sanguniang Panlunsod.
Sa interview sang Bombo Radyo Bacolod kay Marcos Velasco, isa ka tricycle driver kag residente sang Barangay Vista Alegre, ginpahayag sini nga tuman ka alang-alang kun magsugod sa alas-8:00 sa gab-i ang curfew bangud nga madamo sang mga empleyado nga gab-i na ang out.
Dugang pa sini nga maapektuhan man ang ila palangabuhian bangud nga mas mapatimprano ang ila nga pag-untat biyahe.
Suno kay Velasco, mas maayo nalang nga alas-10:00 sa gab-i nagasugod ang curfew.
