UKRAINE – Nagpadulong na sa Lviv, ang border sang Ukraine kag Poland ang pila ka mga Filipino kadungan sang nagasaka nga tensyon matapos ang mga balita nga maga-atake ang Russia sa Ukraine subong ukon bwas nga adlaw.
Suno kay Bombo Radyo International Correspondent Joy Fernandez Tolentino direkta sa Ukraine, nakaistorya na ang embassy sang Pilipinas sa Poland kag nagafill-up na sila sang travel pass agud makapadulong didto pananglitan nga atakehon sang Russia ang Ukraine.
Suno kay Tolentino, may pila na ka mga Filipino nga nagpadulong na sa Lviv, nga malayo na sa capital city nga Kyiv, agud hapos nga makasaylo sa Poland kun may magluntad gid man nga gyera.
Suno sa iya, ila na nagakabatyagan ang tensyon bangud nakabaton ang mga ini sang balita nga posible nga mag-atake ang Russia sa Ukraine subong ukon bwas nga adlaw.
Suno diri, apisar nga nagahambal ang iya mga amo nga nagapamahog lamang ang Russia kag wala sang gyera nga matabo, indi nila gihapon mapunggan ang makulbaan.
Preparado kag handa naman ang ila mga gamit in kaso nga atakehon ang pungsod.
Suno kay Tolentino, ginalauman nga sa Huwebes, magapadulong na ini kaupod ang iya mga amo sa Lviv.
Nagdeklarar man si Ukrainian President Volodymyr Zelensky nga magbutang sang flags kag mga ribbons bilang simbolo sang kalinong kag unity.
