Preparado na ang Bacolod Alliance for Commuters, Operators and Drivers Incorporated (BACOD) – MANIBELA, Kabakod Negros Transport Coalition Incorporated (KNETCO) kag United Negros Drivers and Operators Center (UNDOC) – PISTON para sa pag-upod sa nationwide transport strike sa Lunes kag Martes.
Sa interview sang Bombo Radyo Bacolod kay BACOD President Rudy Catedral, kasunod sang press conference sang National Transport Group nga PISTON kag MANIBELA, gilayon man sila nga nagrequest sang rally-permit nga nabatun naman sang Permits and Licensing Office.
Sila ang magaplastar sa Bata Fly-over, Magsaysay Fly-over, Mandalagan overpass, Bangga Patio sa dalan Burgos, Libertad extension kag sa Fountain of Justice.
Ang mga miyembro sang tatlo ka grupo nga ginabanta nagdangat sa 1,700 ang magaplastar sa mga rally centers halin alas-6:00 sa aga tubtob alas-7:00 sa gab-i.
Sa mga rally sites naman ang mga ini magatulog agud mapadayun ang transport strike sa Martes.
Nagpangayo naman ang mga ini sang pasaylo sa mga maapektuhan nga commuters.
Pahanumdom man sini nga una na nga naghangkat ang grupo sang modernized jeepney nga sila ang makasarang magcater sa mga pasahero.
Suno kay Catedral, luyag nila nga ipakita sa Land Transportation Franchising and Regulatory Board (LTFRB) nga indi nagakaangay nga dulaon ang mga traditional jeepneys.
Panawagan sang mga ini nga sila ang mahatagan sang prangkisa kag rehistro, bangod sila ang nagarisgo na lamang sa pagbyahe apisar nga wala sang insurance agud may ibuhi sa ila pamilya.
Suno diri, luyag lamang nila nga indi madula ang palangabuhian kag panugyan sini nga pahanugutan lamang sila nga makarehistro bangod ang commuters ang magapili lamang sang ila masakyan.
Paathag ni Catedral nga wala sang problema kun magsakay sa modernized jeepneys nga di-aircon ang may kulukwarta, apang ang mga alang-alang ang budget ang kuntani pahanugutan nga makasakay lamang sa jeep nga nagasukot sang P10 nga plete.
