Madamo na sang mga Bacolodnon athletes nga nagpakita sang ila abilidad kag nagdaog sa pila ka mga pahampang sa Batang Pinoy 2025 sa General Santos City.
Sa interview sang Bombo Radyo Bacolod kay Geraldine Montemayor, Youth Development Assistant sang Bacolod City Youth Development Office, kahapon ginpatigayon ang opening ceremony apang may mga nauna na nga ginpatigayon nga hinampang.
May pila na ka mga hampang nga nadaog sang Bacolod athletes kahapon kaangay sang Futsal, Boxing kag madamo man sang mga chess players nga nakadaog sa lainlain nga age category.
Kaina sang aga, nagdaog man ang beach volleyball team sang Bacolod.
Magapadayun pa ang mga pahampang kag madamo pa sang mga Bacolodnon athletes nga nakaschedule tubtob sa Oktubre 30.
Suno kay Montemayor, sa pag-abot nila sa GenSan, nagpahuway lamang sila sang isa ka adlaw kag ang mga coach ang gilayon na nga nagtsekyar sa mga playing venues agud mafamiliarize kag temprano pa nga matultulan.
Aminado naman ini nga may-ara gid man sang kabudlayan sa traffic gikan sa ila nga billeting area.
Antes ang opening, una naman nga ginhatag sa mga kabataan ang ila nga mga allowances agud sila ang magconcentrate na lamang sa mga palaabuton nga hampang.
Ginapasalamatan man sini ang Bacolod City Government nga nagpadala gid sang logistic officers nga magabulig sa ila.
Apisar nga gin-ulan ang opening kahapon, ini ang ginakabig ni Montemayor nga blessings.
Ginpasalamatan man nila ang suporta sang mga ginikanan sa mga sports sang ila kabataan.
Nagalaom si Montemayor nga makapauli ang Bacolod City athletes sang madamo nga bulawan nga medalya.
