Pila ka mga residente sang Barangay Alijis, ciudad sang Bacolod ang nagperma sa papel nga ginpalibot sa barangay para sa petisyon sang pag-amyenda sa konstitusyon sang Pilipinas.
Sa intervew sang Bombo Radyo kay Tatay Ron, nagatrabaho sa Barangay, nagperma ini bangod sa ginhambal sa iya nga may yara sang pagbag-o kag ginpasaligan man nga indi na pag-ilisan pa ang mga empleyado sang barangay kasubong nga halos tanan nga empleyado sang barangay ang nagperma sa papel.
Suno diri, wala man sang may madula kun ini ang magperma.
Ila ginbutang sa papel ang ila pangalan, precinct number kag perma kag ginahatagan sang eksplenasyon.
Aminado ini nga wala pa sini nahibaluan kun ano ang padulongan sang ila nga ginpermahan.
Sa interview naman sang Bombo Radyo kay Nanay Fe, basta may yara sang ginapapermahan ang barangay, nagapearma lang gid ini.
Suno diri, wala sang may ginhatag sa ila nga bisan ano nga goods ukon kwarta ang barangay sa ila sang sila nagperma.
Samtang, “Go with the Flow” naman ang pahayag sang isa ka nagperma nga bisan sin-o man ang nagapungko sa kongreso, indi man ang mga ini ang nagapakaon sa ila.
Sa interview sang Bombo Radyo kay Maam Tess, nalipatan na sini kun ano ang plastada sang ila ginpermahan, basta ginhambalan lang sila nga may yara sang permahan.
Suno diri, wala naman sini ginbasa ang nakasulat sa papel.
Sa interview sang Bombo Radyo kay Maam Rox, sang nakita sini nga nagperma ang iban, nagperma naman lang ini.
Suno diri, ang iya amay nga nagatrabaho sa barangay ang nagperma man.
Dugang pa sini, may yara sang nakasulat sa papel apang wala naman sini ginbasa pa, basta ini indi angot sa utang kag basta siya indi lang mapreso, nagperma lang ini.
