Wala nagapati ang pila sa mga residente sa Bangga Patio, Burgos St., Barangay Villamonte, ciudad sang Bacolod, sa gina-alegar abduction sang college student nga gindala sa ciudad sang Bago, Negros Occidental.
Madumduman nga santo sa pahayag sang biktima sa mga kapulisan sang Bacolod Police Station 4 pasado alas- 8:00 sang gab-i sang Miyerkules, nagalakat ang biktima sa dalan Burgos sa ciudad sang Bacolod para magbakal sang sud-an sang may nagbalabag sa iya nga puti nga van kag pwersado nga ginsulod ini sa salakyan.
Sa sulod sang van may apat ka mga lalaki nga suno sa biktima wala sang tabon ang ila mga nawong.
Ginhigtan sang straw ang liog sang biktima kag ini ang naka-angot man sa higot sa iya kamot.
Kapin, alas-10:00 sang gab-i nag-untat ang van sa bahin sang Barangay Sampinit ciudad sang Bago, kag nanaog ang duha ka mga lalaki para manigarilyo kag mangihi.
Bangod nga may gamay nga bukas ang salakyan, nagka-tsansa ini nga maglumpat kag malagyo.
Kasunod sini ang biktima ang nakit-an sang mga nagapangita sang damang kag gilayon nga gindala sa Bago City Police Station.
Sa interview sang Bombo Radyo Bacolod kay Evelyn Bibero, isa ka caretaker sa private cemetery, masobra 20 na ini ka tuig nga nagacaretaker apang sang natabo ang gina-alegar nga abduction wala ini sang namutikan kag nabatian nga may ginkarga sa van.
Suno diri, ang pamangkot sa karun sa diin ang gina-alegar gin-abduct mabakal sang sud-an bangud malayo man ang balaklan sa nasambit nga lugar.
Magluwas sini madamo ang mga tawo kag masanag man ang lugar.
Suno diri kun may kaangay nga insidente nga matabo makita kag mabatyagan gid nila.
Ini bangud masanag kag madamo man sang mga pasahero kalakip na ang mga babayi nga nagabantay sang masakyan sa nasambit nga oras sang natabo ang gina-alegar nga abduction.
Ginpahayag man sini nga kun may may yara sang mga silver nga van sa lugar nga nagasugat sang mga call center agents.
Samtang suno naman sa isa ka tricycle driver sa Bangga Patio, Burgos St., Barangay Villamonte, ciudad sang Bacolod nga masanag ang lugar kag madamo sang tawo didto bangud madamo ang nagabiyahe sang tricycle.
Suno kay Ray, kun alas 8:00 ang takna sang gab-i natabo ang insidente wala sila sang natalupangdan bangud nagagarahe sila alas 10:00 na ang takna sang gab-i kag ang iban sa ila asta mag-aga nga nagabiyahe sang tricycle.
