11 na lamang sa mga sakay sang mini dump truck nga naaksidente sa Sitio San Juan, Barangay Guimbalaon, Silay City kahapon ang nagapabilin sa ospital, kalakip na ang driver..
Madumduman nga pito ang napatay, lima ang kritikal kag 12 ang mga nag-angkon sang minor injuries gikan sa mga Job Order casuals sang Silay City Government matapos natumba ang mini dump truck.
Ang mga biktima ang gikan sa tree planting activity nga ginpatigayon sa Barangay Lantad sa sulod sang Northern Negros Natural Park.
Sa interview sang Bombo Radyo Bacolod kay Police Lt Col. Mark Anthony Darroca, hepe sang Silay City Police Station sa walo nga nag-angkon sang minor injuries nga gindala sa Teresita Lopez Jalandoni Provincial Hospital sa Silay City, napagwa na ang anom kag duha na lamang ang nabilin kalakip ang driver.
Ang driver ang naka-angkon sang fracture sa ribs, samtang natapos naman ang reglementary period sang hospital arrest sini alas-4:00 kaina sang kaagahon.
Kahapon, napatigayon na si Darroca sang case conference agud mafast track ang mga kinahanglan nga dokumento inkaso nga may luyag magpasaka sang kaso.
Apang sa karun, may 11 na ka biktima kalakip ang pamilya sang duha nga napatay nga nagmanifest nga indi na magpasaka sang kaso.
Kun may luyag nga magpasaka sang kaso, ini ang ipaagi na lamang sa regular filing nga mahimo magfile sang reckless imprudence resulting to homicide, reckless imprudence resulting to physical injury ukon malversation of government property kun mapamatud-an nga may kapabayaan sa bahin sang driver.
Ipatsekyar man nila sa eksperto ukon mechanics ang under chassis sang mini dump truck agud matumod kun may deperensya.
