Nangin madinalag-on ang Swimming team sang Bacolod Delegates nga nagpasakop sa Batang Pinoy 2023 nga ginpatigayon sa Manila.
Sa interview sang Bombo Radyo kay Nina Jhoannica Marie Gabo, gold medalist sa swimming, tuman ang kalipay sini sa nakuha nga medalya dala sa kooperasyon kag effort sang ila nga team.
Lima ka tuig pa lamang ini sang ini una nga nag-ensayo sa swimming kag didto na nag-umpisa ang kaluyagon sini sa paglangoy.
Sa interview sang Bombo Radyo kay Che Gabo, iloy ni Nina, nakita sini ang kalipay sa iya bata nga nagpauli nga may bitbit nga medalya kasubong man sa nangin manami nga eksperyensya sang mga atleta.
Samtang, wala naman nag-ekspektar ang 11 anyos nga si Elise Madisson Bonda nga makakuha man sang gold medal sa swimming competition.
Sa interview sang Bombo Radyo kay Elise, naga-ensayo gid ini kada matapos ang iya klase sa sulod sang anum ka adlaw.
Suno diri, sang nakuha sini ang bulawan nga medalya, tuman ang iya kalipay kag pagpasalamat sa iya nga team kag coaches.
Sa interview sang Bombo Radyo kay Joy Bonda, ang iloy ni Elise, wala gid ini nag-ekspektar nga makakuha sang gilayon sang bulawan nga medalya si Elise bangod ini ang una nga kahigayunan nga ini ang nagpasakop sa Batang Pinoy.
Suno diri, sila nagrepresenta sang ila nga club kag ciudad kag ang medalya nga nakuha ang isa ka Christmas gift para sa ila.
Tuman naman nga kaluyagon sa pagswimming ang naging rason sang 12 anyos nga gold medalist amo nga nagpadayon ini kag nag-ensayo sang husto.
Sa interview sang Bombo Radyo kay Anika Kathryn Matiling, sa una sini nga pag-ensayo sa swimming wala na ini nag-untat pa kag iya ginpadayon ang nahiligan nga sports.
Samtang, sa interview naman sang Bombo Radyo sa amay sini nga si Paul Matiling, indi mahapos ang hampang sang mga kabataan sa Batang Pinoy, apang si Anika nakakuha sang tatlo ka gold kag isa ka bronze nga medalya bisan ini ang una nga kahigayunan nga ini nagpasakop sa Batang Pinoy.
